本集《暢樂客語屋，WOW！》主題係〈夢想力量大〉，透過校園街訪摎來賓訪談，展現夢想對細人仔成長个重要性摎影響力。節目一開始由三位學生仔來分享自家个夢想——想做太空人探索宇宙、做點心師傅做出分人歡喜个雞卵糕、還有做一個漫畫家，展現出夢想多元還過異有創造力个一面。
主持人敏莉摎瑜琦乜分享吔自家細人仔時个夢想，分別係做小說家摎畫家，就摎逐個細人仔个想像摎期待共樣。因為夢想無論大細，都係心肝肚一粒靚靚个仁，斯愛用心淋水，就有機會實現。
節目裡背還邀請著小朋友雯竹摎厥个媽媽淑惠來分享。雯竹个夢想係做插畫家，佢好畫圖，靈感係對一本故事書來个，希望自家乜做得創作出分人中意个圖畫。佢識參加比賽無得獎，心肝肚乜試著艱苦，毋過有媽媽个鼓勵，還係堅持繼續畫圖。淑惠媽媽強調夢想無應該拿來做比較，應該愛分人實踐摎享受，乜鼓勵家長陪細人仔共下成長。
節目最尾，鼓勵小朋友勇敢講出夢想，乜提醒大人愛成為支持細人仔个力量。毋管係畫家、科學家還係魔術師，斯愛相信自家，夢想就毋會忒遠。
