本集《暢樂客語屋，WOW！》主題係「𠊎有話愛講」，邀請學生仔分享自家个學習心得摎挑戰，反應出成長過程个心聲。節目開頭校園街訪考學生仔考試後个心情摎想法，有人考毋好想愛摎考卷燒忒、因為無用心嗄失分等，展現真實又得人惜个一面。
節目中紹介投稿來信，包括六年生个學生仔美婷分享佢仰般對數學困難裡背尋著適合自家个學習方式，透過摎朋友練習還有認真寫題目，成績有明顯進步；另外一位投稿者阿強寫講自家識在考試打尾名，經過親友鼓勵後改變學習態度，總算在期中考拿著好成績。
現場來賓育璿摎媽媽立琪乜分享佢兜親身个經驗，育璿个作文落筆有困難，聽先生个建議對自家个感受出發，定定仔提升表達能力。立琪媽媽強調逐隻細人仔都有無共樣个學習節奏，家長个理解摎支持非常重要。
節目包尾引用客語諺語「知得孔翹，打得鬼噭」鼓勵學生仔，斯愛尋著方法、有耐心去做，逐儕人都會進步，乜歡迎聽眾朋友勇敢講出自家个故事，繼續分享摎學習。
