各位聽眾朋友，你敢有佮意浸溫泉？今仔日「佇厝講台語」咱欲來講的主題是：「來去浸溫泉」！嘉芬校長佮淑惠老師邀請著臺北市復興高中的洪詮益同學做伙來開講，紹介北投浸溫泉的好所在。
詮益講著北投有三个免費的溫泉區會當來泡跤。一个和in學校仝名號做「復興公園」離in學校上近，一个是「泉源公園」，一个是「硫磺谷」。這三个有無仝的特色。復興公園、泉源公園是青磺，水看起來清清；硫磺谷是白磺，水看起來白殕白殕。浸溫泉嘛有人講是-浸磺水喔。
若是欲浸規身軀，就會當去「北投溫泉公園」，遐有一个室外的溫泉池，環境清幽，俗閣大碗。一張票40箍，老人票20箍，比一杯咖啡較俗。
節目的尾聲除了感謝在地報馬仔共咱報好空，嘛鼓勵聽眾「佇厝講台語」喔！
