各位聽眾朋友，你敢會曉煮食咧？今仔日「佇厝講台語」咱欲來講的主題是：「來煮食喔」！
嘉芬校長佮淑惠老師邀請著臺北市復興高中的朱伯諺同學做伙來開講，分享伊佇學校煮咖哩飯的過程。
伯諺講代先煮飯進前，先共雞肉用豆油、咖哩粉小豉一下，閣來共洋蔥和雞肉炒炒咧。紲落來愛用電鍋煮飯，才閣用剾仔共紅菜頭、馬鈴薯的皮剾剾咧。提一个鍋仔，水燃予滾，才共紅菜頭、馬鈴薯囥入去煮予爛，若用炊的嘛會使，共炒好的雞肉囥入去鍋仔，才閣共咖哩塊囥入去，愛抐抐咧，鍋仔底較袂臭火焦。若是會當濫一寡椰子粉和一片起司，會加真紲喙。
節目的尾聲嘛有鼓勵聽眾「佇厝講台語」，和厝內的人好好仔規劃煮一頓仔好料的，毋但會當學台語嘛會使培養感情喔！
