各位聽眾朋友，今仔日「佇厝講台語」咱欲來講的主題是：同學之間難免會冤家，按怎排解才好。淑惠老師講著大人攏知影佮人冤家愛「鬱鬱在心底，笑笑陪人禮」，毋知少年家按怎想，所以今仔日邀請著復興高中的洪詮益同學來分享冤家的經驗。
詮益講伊冤家的經驗有分大冤佮小冤。有一改欲上體育課，in和隔壁班預約著相仝的場地，逐家「輸人毋輸陣，輸陣著歹看面」人濟就敢大聲，差一點仔就起跤動手，佳哉，老師歕一聲觱仔，逐家就恬去矣。
講著小冤，有當時仔家己心情無好，就牽拖別人，無歡喜就和人冤家。無論大冤抑是小冤，老師有講過「相罵無揀喙，相拍無揀位。」，所以若是有這種情形就愛先冷靜一下，處理家己的心情。
節目的尾聲有鼓勵聽眾「佇厝講台語」，嘛會使和厝內的人好好相處，莫冤家喔！
