各位聽眾朋友，你敢會曉騎跤踏車？今仔日「佇厝講台語」的主題是「騎跤踏車愛注意啥物安全？」。
嘉芬校長佮淑惠老師邀請著臺北市復興高中的郭語妡同學做伙來開講，分享伊騎跤踏車的經驗和愛注意的代誌。語妡講伊會騎跤踏車去補習、騎去捷運站坐捷運，閣對捷運站騎轉阮兜、抑是假日佮厝內人騎去公園tshit-thô、騎去駁岸邊做休閒活動。若講著愛注意的安全，來賓嘛有分享：欲騎跤踏車進前愛先檢查看覓輪仔敢有風、鈃仔和手擋仔敢有歹去？另外嘛愛注意交通規則，袂當騎佇快車道、人行道，愛騎佇慢車道的上正爿，閣一定愛戴安全帽仔，莫挵紅燈、若拄著大台車愛離伊較遠的，上重要的就是莫騎傷緊。
節目的尾聲有鼓勵聽眾「佇厝講台語」，毋若會當學台語嘛會使培養佮厝內人之間的感情喔！
