各位聽眾朋友，啥物當時行？今仔日「佇厝講台語」 的主題是「健康飲食當時行」。
嘉芬校長佮淑惠老師提起若講著健康飲食，就想著莫食傷油臊，愛加食菜蔬和果子，加工的食品和糞埽食物愛減食寡。節目中邀請著臺北市復興高中的江相愛同學，做伙來討論in兜平常時仔的飲食慣勢。相愛講in兜攏是食較健康的，阿母煮食的方式毋是用煠的就是用炊的，雖然伊有當時仔愛食用烘的抑是用糋的，毋過其實伊嘛足愛食青菜的啦！伊愛食高麗菜、水蓮、萵仔菜，雖然烘的佮糋的真好食，毋過伊無定定食，只有三不五時和同學食𨑨迌的啦！
另外，食物件的時有健康的習慣嘛是真重要，譬論講愛沓沓仔哺，莫食傷緊，而且愛保持身體有充足的水分。
節目的尾聲有鼓勵聽眾「佇厝講台語」，會使和厝裡的人好好仔討論健康飲食當時行的話題喔！
