各位聽眾朋友，逐个人佮意的課攏無啥仝款，毋知你上佮意上啥物課？今仔日「佇厝講台語」的主題是「佇學校，你上佮意上啥物課？」。
嘉芬校長佮淑惠老師邀請著臺北市復興高中的黃楷和做伙來開講。楷和同學講著因為伊是讀戲劇班的，所以有真濟和其他高中無啥仝款的課，其中伊上佮意的是排演課。伊真佮意佇舞台上表現家己、嘛真享受和同學做伙創作的過程，而且會當扮演無仝的角色，毋過伊感覺上困難的所在就是背劇本，因為老師足嚴格，若有一點仔失覺察就愛重來，所以背台詞攏愛先理解劇情才來呈現聲情。若是用三个詞來形容表演課，伊會選擇「快樂」、「滿意」佮「自信」。
節目有鼓勵聽眾「佇厝講台語」，嘛會使和阿爸阿母分享學校的趣味代，順紲問一下仔厝裡的人上佮意的課是啥物喔！
