各位聽眾朋友，啥物當時行？今仔日「佇厝講台語」 的主題是「運動當時行」。
嘉芬校長佮淑惠老師先講著現代人愈來愈注重運動，無論大人抑是囡仔攏愛運動。節目中邀請著臺北市光復國小六年仔的吳昀臻小朋友，做伙來討論「班上時行的運動」、「運動慣勢佮興趣」、閣有「運動的好處」…等等。
昀臻分享著in彼班最近咧流行接力走標，因為前一站仔代表學校去參加臺北市國小運動會，逐个同學攏足認真拍拚練習。歇寒的時，老師嘛有請in逐工攏愛傳運動的影片去google classroom。平常時仔伊攏會轉去阿媽兜附近的大公園騎跤踏車抑是騎tshu-pang車。
運動真正足讚的，會當予身體閣較健康，心情嘛閣較爽快。節目的尾聲有鼓勵聽眾「佇厝講台語」，會當和厝內的人好好仔分享和討論運動的好處喔！
