各位聽眾朋友，今仔日「佇厝講台語」咱欲來講的主題是：「遠足紮啥物？猶有等路喔！」
節目一開始，嘉芬校長分享著伊逐改若看囡仔去遠足，揹仔閣若哆啦A夢的橐袋仔的。淑惠老師嘛分享著見擺若欲去遠足的前一工，伊攏會歡喜甲袂睏去，佇節目中邀請著光復國小六年仔的吳昀臻同學來到現場，共逐家分享去遠足的心情。昀臻講伊真愛食糖仔餅，所以攏會前一工就招阿爸﹑阿母陪伊去厝附近的超商買。有當時仔阿母嘛會共伊鬥攢飯丸抑是好食的麭。
若是講著遠足，無仝的所在嘛有無仝的特產。昀臻佇節目中有分享著臺南的煎餅、新竹的米粉、臺中的檸檬雞卵糕，閣有宜蘭的牛舌餅。
節目的尾聲有鼓勵聽眾「佇厝講台語」，毋若會當學台語嘛會使培養佮厝內人之間的感情喔！
