各位聽眾朋友，毋知你敢有做過健康檢查？今仔日「佇厝講台語」的主題是「佇學校做健康檢查的趣味代」。
嘉芬校長佮淑惠老師邀請著臺北市建安國小六年仔的賴品元小朋友做伙來開講。分享佇學校做健康檢查是啥物心情佮項目，除了逐冬的量身懸、磅體重以外，讀一年仔、四年仔的時嘛有做過大型的健康檢查，這个時陣就會有足濟愛心媽媽來學校協助，一關一關鬥檢查。阿元嘛有分享著in一年仔的時，戇戇青暝毋驚銃，規班吱吱叫親像咧辦公伙仔。四年仔時，較捌代誌，會看醫生和護理師的表情，臆看家己有健康無。
節目的尾聲嘛有鼓勵聽眾「佇厝講台語」，佮厝內的人分享「健康檢查的心適代」，按呢毋若會當學台語嘛會使予厝內的人做伙感受著校園生活的趣味！
