「大雪」節氣（12月初6～8），天氣愈來愈冷，烏魚群來台灣西南沿海報到。
俗語：大雪來，烏魚到。（小雪小到，大雪大到）
「冬至」節氣（12月21～23），民間俗稱 「冬節」，閣是民俗節日，彼工家家戶戶挲圓仔、拜祖先。
俗語：冬節圓，食了準備過年。
俗語：冬節烏，較肥豬跤箍：較好食豬跤箍
冬節烏，是指烏魚來到「冬節」時，是上肥、上好食ê時機。
烏魚：分類屬鯔科ㄗ，本名鯔魚tsu-hî，鯔是烏色ê 意思。民間俗稱「烏魚」、又稱「烏仔魚」。
信魚：烏魚又名「信魚」指守信用ê魚，逐冬ê寒天，隨著北方ê大陸沿岸流（親潮）（中國渤海Pu̍t-hái），落南來到台灣海峽，漁民就一路對馬祖追蹤、纏綴，一直到台灣西南沿海捕掠烏魚。自古到今攏仝這个時間，行仝這條路線。所以稱呼「信魚」，閣有「聖魚」ê雅稱。
正頭烏：根據台灣文獻記載，烏魚一般佇冬節前10工到台南，漁民稱呼「正頭烏」，無論是烏魚子（母魚卵巢）、烏魚鰾(piō公魚精囊)、烏魚腱（胃囊）、烏魚殼（烏魚外身），是上肥、上好食ê時機。
回頭烏：烏魚是倒翻箍泅（洄游性）ê魚類。所以佇南台灣海域卵放了，就對恆春上北，轉去原生地。這就是俗語所講--ê：「烏仔魚搢水-毋認輸」。
上早ê台灣漢人祖先是為著欲掠烏魚，一路追趕才來到臺灣。因為佇17世紀荷蘭人統治臺灣進前，就有福建、廣東沿海漁民來台灣本島和澎湖掠烏魚，起初干焦佇寒--人ê季節暫時停留。後來才閣兼種作，才沓沓仔定居落--來。簡單講：「烏魚」是唐山公來台灣ê中人、ê媒人婆。
漁民推崇烏魚叫「烏金」，因為規身攏有伊ê經濟價值。母--ê魚卵是高經濟價值ê「烏魚子」（卵巢），公--ê「烏魚膘」（精囊），會當用來炒麻油進補，烏魚胘（kiān胃囊）是配酒菜ê好料理，最後魚身「烏魚殼」用來煮湯抑是煮烏魚米粉。
掠烏魚著愛掠著時機，因為母--ê烏魚離開台南游到高雄ê時，就開始放卵，腹內已經無烏魚子矣，毋過現此時，因為氣候暖化，誠濟烏魚猶未到高雄就提早放卵，就開始上北迴游，另外閣有真濟中國漁民佇烏魚猶未到台灣ê時就先搶掠，所致，台灣野生ê烏魚愈來愈少，1979年掠著烏魚ê記錄254萬尾，20冬後，1999年開始落降到50萬尾以下，因此台灣新竹地區開始出現人工養殖烏魚ê聚落。
目前台灣烏魚子出現--ê，有野生--ê（海烏）、養殖--ê（池烏、溪烏）佮進口--ê。仝款攏是台灣料理ê名菜。