臺語來源講透機-3
- 臺語這个名詞佇日本時代就開始咧用矣，到現此時已經百幾冬矣啦乎，閩南語這个詞其實無喔，啊欲哪知影？頂一集有講著國民政府今仔來臺灣的時，所編的遐的課本全部攏寫臺語，共咱這陣咧講話叫做臺語，後來才變做閩南語，in就欲共規納做「方言」。簡單來講，閩南語這个詞是「政治」的需要，佮語言無關係。
- 閣有一个叫河洛語，河洛語這个詞是佇廣東遐的客家人，是佇福建講客家話的福建人，in稱呼遐的講漳州話、泉州話這款的就共稱呼叫做河洛語(福佬語)。咱攏知這字佬，咱講德國佬、美國佬真正是咧共人輕視的，就是福建遐的人咧講的話，叫做「福佬」，福就是福建，「福佬語」就是以客家人的觀點來號的名。
- 後來民國50年彼陣，有一个政大的學者叫做吳槐，彼當陣欲強調「根」，所以就講臺語這各个話，是來自黃河、洛水，所以閣加一个「河洛語」就是黃河、洛水兩个合起叫做「河洛語」，其實這是民國56年以後的時陣才出現這个名詞的，因為這款講法非常合著政治的需要。
- 閣另外欲介紹嘛有人講「福建語」，「福建語」就是今仔日南洋、新加坡、印尼等，in攏共這號話稱呼叫做「福建語」，所以真濟人去到新加坡講話會通，就是因為仝來源的仝系統的。另外補充一下，「福建語」以外，in嘛這號話講做「咱人話」，咱人咧講的話，是按怎後來進入講做「閩南語」呢？因為毋管漳州、泉州、廈門、潮州攏佇福建的南爿，所以就共叫做「閩南語」，其實真正語言學內底這是後來的代誌矣。
- 咱有一个「閩語系」，但是無「閩南語」，所以佇早前的時，咱干焦有所謂的漳州、泉州這款的話，到日本時代詞才有一个「臺語」。國民政府一開始嘛是叫做「臺語」，這愛強調後來是因為政治的需要，所以就共叫做「閩南語」，因為漳州、泉州攏屬於南爿，「福佬」是客家人的觀點來稱呼福建遐的人所講的話。啊若「河洛」是一个政治大學的學者吳槐伊所創造出來的。
- 另外補充一件代誌，有人講毋管是「閩南話」、「閩南語」、「臺語」、「福建語」抑好，到底遮的話是佗位咧用？「閩南話」、「閩南語」、「臺語」、「福建語」遮的語言毋是干焦臺灣咧講爾，包括福建、閩南地區、浙江沿海、廣東東部沿海、江蘇、安徽、江西、海南島等，in攏嘛有咧講這个所謂的「河洛語」、「福建語」。
- 若稱呼「福建話」這个語言的咧，有新加坡、馬來西亞、汶萊、印尼、越南、泰國、緬甸、寮國、菲律賓、香港等國家。香港嘛有一部份咧講「閩南語」呢，你敢會問講全世界有若濟人咧講「閩南語」的，這有統計喔，佇2000年左右全球以「閩南語」包括「潮州話」佮「海南話」來講，有8千萬外人，排全世界第18名。咱毋通看輕這个語言，這个語言伊嘛是相當有市場的。
〔註〕
河洛語一詞來自政大吳槐教授所提出。吳槐 1955.11《台北文物》四卷三期〈河洛話(閩南語)中之唐宋故事〉。
「河洛話（語）」一詞來指稱閩南話，起於 1955 年吳槐發表於《臺北文物》第 4 卷 3 期的〈河洛語（閩南語）中之唐宋故事〉一文：「顧現在之河洛語（閩南語）中尚存許多歷代典故」（吳槐，1955：67-75）， 文中未具體論證依據。其後在〈河洛話叢談〉一文以：「閩南語，俗謂之河洛話。」