千金譜41
第九章
瓷仔店，也有欠。欲買大醃缸，大鼎、東洋佮灶磚，雁子做灶門；鐵銚、鍋仔佮茶鈷；煎匙、火鉗佮烘爐；急燒、火炭佮水壺；甕(土同)、矸仔佮香爐；燭台、香筒佮宣爐；茶甌、茶罐、十副盞；花矸、古盤、什錦碗；碗仔、蝶仔、湯匙合一盤。一个錫瓶、十雙箸，大(石匹)、斗碗共幼碟。粗瓷、粗缽著爊煎，大坩、矸仔、酒鍾盤；新水桶、著好擔，新飯斗臭杉柴；面桶仔著漆紅，跤桶、腰桶好杉；摔桶、炊桶共拔桶；戽斗、鱟桸兼飯篱；鼎(竹敢)、水升、匏桸兼鼎(扌祭)；廚房著齊備，煮食有好味。鹽、糟、醬、醋佇灶邊；豆油兼豆鼓，蔥頭永不離。砧著厚、刀著利，切蔥菜、切魚肉；芫荽、芹菜枝，韭菜，苳蒿一大披；芥菜、菠(艹稜)佮筍絲；莧菜、蕹菜正著時；葫椒、白菜、竹仔枝，菜色買全備。愛買豬肝、腰子佮豬肺。煮豬血著豬油，大腸、小臟一大毬。豬頭尾炕鹹菜，豬跤蹄總著煨，炒豬舌韭菜花，豬屎尿壅苦瓜，飯著炊、肉著煨，肉湯炕苦瓜。山珍海味著配酒，紹興老酒浸木瓜，高粱火燒刀，七甕十四鍋；欲食粿家己炊，甜粿、肉粽、麻糍、豆花，米糕、發粿、樹子、醃瓜，檨仔、龍眼、林菝、菜瓜，弓蕉、王梨、紅柿、西瓜，涼粉、仙草、刺瓜，粉粿、椪柑、芳水梨，蓮霧、香果佮冬瓜，粿仔共荔枝，其性味不齊，酸甜苦辣澀，梅仔酸齒牙。