以早嘛有人問我一句俗語，這句逐家較少聽著，所以較袂曉。「目睭掛斗概，看人物就愛」，(目睭掛斗概，看人物就愛)，「斗概」，阿如，你敢知影是啥物？毋知，斗概就是以早人買米的時陣，就有一支柴做的，佇上頭共抹予平，表示講內底已經貯滇矣，所以「目睭掛斗概」就是講，咱量的時陣攏已經抹過，表示內底滇矣，你閣目睭掛斗概，這也看、彼也看，這也欲、彼也欲，按呢就會按怎?表示傷過痟貪。其實講著痟貪，台語嘛有足濟笑詼的俗語。以早咱捌講過，有毛食到(棕簑)，無毛食到(秤錘)；兩跤食到(樓梯)，四跤食到(桌櫃)；有肉食到(肉臊)，無肉食到(糞埽)。阿如，你閣記甲遮清楚，足厲害。其實這攏是用來形容，無人真正會去食秤錘、食棕簑，只是形容講真顧食，連這袂當食的物件，伊嘛欲共推落去，彼就真正有夠愛食。
音量
80%