生雞卵，對主人有貢獻，毋過放雞屎是加顧人怨，也就是講你對這个團體無貢獻，閣顛倒舞足濟空，愛人替你拭尻川。就親像這馬真濟大學生拄仔畢業出社會，咱嘛提供一寡建議予聽眾朋友罔做參考。少年人拄出社會第一點一定愛按怎？做代誌愛知影家己的能力佇佗位。有時咱講耍笑，你食會落，嘛愛放會出來，「無彼个尻川，莫食彼个瀉藥。」甚至閣講:「厝內無米，毋通飼人大跤婆」，就是講你無彼種才情、你無彼種能力，你就莫共人答應傷濟，(莫共人允工課)。明明若是別人去做可能做了袂䆀，結果你講:「頭家，予我!予我!」結果你共人舞甲代誌顛倒反，攏用袂好勢，彼就真正是「生雞卵無，放雞屎有。」另外，就是講真濟少年輩咧做代誌，目睭毋通看懸無看低，你毋通想講這其實聽起來若簡單簡單，「規暝全頭路」，結果「天光無半步」，講一堆，按呢顛倒無好。尤其足濟少年輩咱愛知影一个觀念，咱愛有家己的才情、有家己的能力，若無「大工無人倩，小工毋願行」，按呢就做無代誌，因為咱這馬上驚是「講著全頭路，欲做就無半步」，這就是華語講的『眼高手低』彼種意思。另外，就是咱佇企業界食頭路，有時嘛愛想講咱有創意是誠好的代誌，毋過有時嘛毋通想傷濟，毋通「枵狗數想豬肝骨」、「山雞數想水鴨」，因為無仝的環境、無仝的職業，就有無仝的狀況，袂當講伊按呢做，咱嘛會當按呢做，這就差較濟，所以「生雞卵無，放雞屎有」，意思較倚一句華語講的:「成事不足，敗事有餘」。
音量
80%