若欲講著「有唐山公，無唐山媽」這句俗語，咱就愛共祖先對唐山來台灣發展，做一个簡單的介紹。以早有人講 :「福建歹徛起，逐家緊來去。來去穩有某，毋免唐山遮艱苦」欲去佗位 ?當然就是講台灣啊。嘛因為按呢，有足濟人就走來台灣發展。 「唐山過台灣 ，血汗粒像飯丸 。」嘛有人講:「唐山過台灣 ，心肝結規丸。」其實這兩句，攏是用來形容開墾的艱苦，逐日又閣愛煩惱東、煩惱西，驚船無法度過烏水溝，亦就是這馬講的台灣海峽，閣驚溼氣重、𠢕破病 ，更加愛面對原住民的攻擊，莫怪會講 「十去六死，三留一回頭 。」對這句話，咱就會當看出來，對唐山來台灣開墾，毋是親像「桌頂拈柑 」遐爾簡單的代誌。清朝政府早期就限制對唐山來台灣開墾 ，干焦會當是查埔的。留落的人，若佮台灣在地原住民相意愛，尾仔兩个通婚，毋才會有這句 「有 唐山公，無唐山媽」的俗語，可見台灣早期大多數是唐山公、平埔媽。
音量
80%