巷仔口的台語

主持人 :
節目介紹 :

播出時段:106年9月4日起 週一至週五12:20~12:25

台灣閩南語教學單元

節目內容以教育部閩南語常用詞辭典俗諺為架構,搭配時事或故事,以輕鬆的題材為主,用對話方式進行閩南語教學,介紹有趣的台灣閩南語。

邀訪來賓:無

上尾仔一集就來講寡佮感謝報恩有關的俗語。頭一句俗語是「食人一口,報人一斗」,嘛有人講「食人一口,還人一斗」、「食人一斤,也著還人四兩」,毋過,我咧想,人共咱鬥相共、鬥跤手,咱無應該用「還」的概念,應該愛有「報恩」的行動。別人的恩情,咱毋但愛謹記在心,閣愛感恩惜福、知恩必報、加倍報答,按呢才是正港的臺灣人。

邀訪來賓:無

交著好朋友會相牽成,上驚交著歹朋友,「佮好人行有布通經,佮歹人行有囝通生」、「人牽毋行,鬼牽溜溜行」,按呢就害矣。俗語講:「人交的是關公劉備,你交的攏是林投竹刺」,就是講別人交的朋友攏是關公、劉備這種正人君子,是按怎你攏交一寡王哥柳哥的歹朋友咧?交朋友愛特別注意,目睭愛褫予金。

邀訪來賓:無

「趁錢有數,性命愛顧」,巧的顧身體,戆的顧家伙,身體是家己的,家伙是囝孫的,尤其袂當為著趁錢,為非糝做,趁一寡失德錢,愛知影「僥倖錢,失德了;冤枉錢,跋輸筊」,這是咱祖先的教示,聽眾朋友做生理的時,千萬愛謹記在心。

邀訪來賓:無

「歹竹出好筍」。講話的人本意是欲呵咾囡仔,對方的爸母聽人咧呵咾,雖然予人剾洗,嘛是會笑笑仔接受,袂去佮人計較。若是欲強調別人的表現超出咱平常時仔對伊的印象,咱就講:「烏矸仔貯豆油」這句孽譎仔話就好,後壁才接「無地看」,千萬毋通講「歹竹出好筍」來共人剾洗。

邀訪來賓:無

「好額毋值著會食,好命毋值著勇健」,我想食物件嘛愛注意,毋通喙白,抑就是揀食,「食魚食肉,也著菜佮」。閣有,以早老師捌講過的「早頓食飽,中晝頓食巧,暗頓半枵飽」、「暗頓減食一口,活甲九十九。」這幾句俗語,嘛是聽眾朋友欲追求健康愛注意的觀念。

邀訪來賓:無

咱人的一生,袂逐日攏咧過年,嘛袂逐日攏行衰運,「圓人會扁,扁人會圓」,只要咱堅持理想無放棄,後擺成功一定是咱的。其實老師講的「圓人會扁,扁人會圓」就是「愛拚才會贏」的道理

邀訪來賓:無

查埔人做事往往較衝碰,查某人較頂真、較幼路,所以若欲做代誌進前,上好參恁某好好仔參詳一下,按呢會較齊全、周至,尾仔成功的機會就會較大。橫直「一人智,不如兩人議」、「一人主張,毋值兩人思量」,翁仔某做伙拍拚,按呢事業才會成功,這就是「翁某若仝心,烏塗變成金」的道理。

邀訪來賓:無

這是古早查埔追求女性成功的條件,一錢就是愛厝裡有錢,足濟媠姑娘攏想欲『嫁入豪門』;紲落去愛有緣份,所以講二緣;第三你愛生做緣投;第四袂當傷老,這就是「一錢,二緣,三媠,四少年」的意思。有的人較激骨,尾仔閣共其他的條件順紲鬥規捾,煞變做「一錢,二緣,三媠,四少年,五好喙,六敢跪,七皮,八迷戀,九強,十敢死,十一雄,十二無天良」。

邀訪來賓:無

「食了牛犬,地獄難免。」這句俗語是欲提醒咱愛知影感恩,毋通忘恩背義。另外,「做牛著拖,做人著磨。」意思是講咱做人就親像做牛仝款,愛認份去做工課;「甘願做牛,毋驚無犁通拖。」是共咱講只要你願意食苦,就免驚揣無頭路,橫直「油湯趁油湯食,毋趁做乞食」

邀訪來賓:無

祖先共咱教講:「有知識就會博,無知識會予人揍」,做人千萬毋通假䔃,袂當基礎都猶袂拍好勢,就數想一步登天,真正是「食無三把蕹菜,就想欲上西天」,愛會記咧,做代誌袂使「未曾學行先學飛,未曾掖種想挽瓜。」你都猶袂曉行路,就毋通想欲學飛;無掖種,伊就連發穎、大欉、開花遮的過程都猶袂發生,欲按怎結子,甚至哪有瓜通挽咧?

邀訪來賓:無

「囡仔跋倒-馬馬虎虎」是講囡仔跋倒會嘛嘛吼,做老母的人,會緊共抱起來撫撫咧。老母就是媽媽,媽媽共囡仔撫撫,鬥做伙就變做媽媽撫撫,聽起來就敢若馬馬虎虎,「囡仔跋倒-馬馬虎虎」就是用來笑人做代誌凊凊彩彩、無夠頂真的孽譎仔話。人講:「一个人的態度,決定一个人的懸度」,有懸度,看代誌就有無仝的角度,是按怎有
人會成功,有人顛倒定定失敗,我想態度就是足重要的因素

邀訪來賓:無

遮爾濟人客當中,加減會有一寡漚客,姑不二三將拄著啊,嘛是愛忍耐,用笑容面對漚客,就算伊閣按怎抝蠻,兇拳無拍笑面人,所以祖先共咱教講:「人無笑面免開店」,欲做生理一定愛有笑面。總講一句,「忍氣求財,激氣相刣」,忍耐是做生理絕對愛有的本領,忍耐久就贏,尾仔才趁會著財富。毋但做生理愛忍,做人做事嘛愛忍,忍耐忍耐,萬事排解:不忍不耐,小事成大。

邀訪來賓:無

老大人歲數較濟,社會經驗豐富,尤其一寡人情世事,較知影鋩角,親像看咱咧包紅包,就共咱提醒「人情世事陪夠夠,無鼎閣無灶」,提醒咱毋通為著顧面子,紅包包傷大包,若無,到月底就無錢通食飯。年久月深,身軀邊無法度儉寡錢,按呢食老日子會真歹過,這就是「少年袂曉想,食老毋成樣」的道理。像這種教示,咱愛謹記在心,若無,你就會「毋聽老人言,食苦在眼前」、「毋聽老人話,你會真狼狽」。

邀訪來賓:無

「大甲溪放草魚」這原本是沙鹿一帶的俗語,普通人放魚栽,攏是囥佇家己的魚池內底飼,等伊後擺大尾就會當撈來賣。毋過,若是共將魚栽囥落去大甲溪,這是公共場所,魚仔大尾是啥人撈著就啥人的,袂當閣講彼是你的,所以「大甲溪放草魚-有準無」啦。「大甲溪放草魚-有準無」,我想應該是『肉包子打狗,有去無回』的意思,表示有的代誌抑是物件可能原本是你的,不而過,因為處理無好勢,終其尾已經佮你無底代,『回不去了』!

邀訪來賓:無

老大人生活經驗較濟,俗語就教咱「老人毋講古,少年毋捌寶」,所以愛定共老大人請教,因為「過橋較濟你行路,食鹽較濟你食米」,經驗豐富。「老人食紅蟳─講無效」,這是臺語的孽譎仔話,普通人食紅蟳誠愛齧蟳仔管,因為內底肉較濟,偏偏老大人喙齒無好,就算想欲食,嘛齧袂落去,所以蟳仔管對老大人來講是無效的。毋才會講「老人食紅蟳─講無效」,意思是就算你講甲喙角全波,講閣較濟嘛無路用,無效啦。

邀訪來賓:無

俗語是先民的智慧,就親像「食果子拜樹頭,食米飯拜田頭」,就是教咱有果子、米飯通食,愛感謝樹頭、田頭,更加愛感謝種作的人,嘛愛多謝送貨佮賣物件的人,抑就是對世間萬物,咱愛定定心存感恩。自古早到現代,「有孝」一直是咱臺灣人誠重視的價值觀,毋才有「勸恁有孝千萬句,袂曉有孝豬狗牛」的俗語,